किराना पसल गर्ने अविवाहित महिला रामकुमारीले आफ्नो ग्राहक राजकुमारसँग भनिन् “दाइ तपाईंको विवाह भएको छ कि छैन ?” “मेरो विवाह भएको छैन । मजस्तोलाई कसले पत्याउँछ र ?” राजकुमारले भन्यो ।
राजकुमारको यो जबाफले महिलालाई धेरै खुसी तुल्यायो । “त्यसो भए दाइ तपाईंका लागि राम्री केटी म नै खोजिदिन्छु” रामकुमारीले भनिन् ।
राजकुमारले भने, “मलाई राम्रो व्यवहार भएको केटी चाहिन्छ” । त्यो पसलको बाटो ओहोरदोहोर गर्दा कता जान लाग्नुभएको दाइ ? भनेर पसल्नीले सधैँ सोध्ने गर्थिन् । पसल्नीले राजकुमारको घर चिनेपछि उसको घरमा गएर राजकुमारकी आमालाई भेटेर भनिन्, “हजुरको छोराको विवाह अब कहिले गर्ने ?”
एकदिन राजकुमार त्यही पसलमा केही सामान किन्न जाँदा पसल्नीले ‘तपाईंकी आमालाई मैले भेट्न जाँदा तपाईंको लागि राम्रो आनिबानी भएकी केटी खोजिदिनुभए हुन्थ्यो’ भन्नुभएको थियो भनिन् ।
“केटी कहिले खोजिदिनु हुन्छ त” राजकुमारले भन्यो ।
“तपाईंलाई अहिले चाहिएमा अहिले नै खोजिदिन्छु” पसल्नीले भनिन् । राजकुमारले हुन्छ नि त भन्यो । अनि पसल्नीले लजाउँदै भनिन्, “केटी अहिले तपाईंलाई नै हेरेर मन पराएर बसेकी छे” ।
-सामाखुसी मार्ग, सरकारी धारा, काठमाडौं
