हुर्रिँदै आए वैरी अचानक, हुरी झैँ तालिबान
सकेन गर्न प्रतिकार अन्त्यमा, हारे अफगान !
राष्ट्रको अध्यक्ष नै भइदिए, देशबाट फरार
जनताहरु अब कहाँ गई, गरून् हारगुहार ?
बाँच्ने जिजीविषाले विमानभित्र, भीड गर्दै पसे
धक्कमधक्कामा बिचरा कोही, विमानबाटै खसे !
मरिने निरिह जनता नै हुन्, विचराको के दोष ?
अहंको मादले मन भाँडिँदा, हुन्छ कसको होश ?
सुनिन्छ नेपालीहरु पनि धेरै, फसेका छन् त्यहाँ,
समाचार सुनेर गाउँघरमा, रुवाबासी यहाँ !
युद्ध कत्ति पनि हैन है राम्रो, कसले बुझिदिने ?
हतियार मतियार दुवै आफै, कस्ले सुनिदिने ?
महाराजगञ्ज, काठमाडौँ
हाल : इटहरी, सुनसरी
