विष्णु तिवारी परदेशमा रहेर पनि भाषा साहित्यमा समर्पित प्रतिभा हुन् । साहितयसागरको प्रस्तुत शृङ्खलामा उनको एउटा व्यङ्ग्यात्मक गजल रचना समेटिएको छ । यस रचनाले समसामयिक राजनीतिक अवस्थामाथि व्यङ्ग्य गरेको छ । -सम्पा. |
मुङ्ग्रो घुमाइ किन हाने बुझ्न सकिएन
टुटिलो छाम्दै कता जाने बुझ्न सकिएन।।
वैरी भन्ने कोही हुन्न आफ्नो खाँचो पर्दा
कस्ले कस्लाइ किन माने बुझ्न सकिएन।।
किलो ठहर्यो सिमको सांसदको जागिर
हल्लाइ वरि कता ताने बुझ्न सकिएन।।
दुलो पार्दै ढुकुटीमा रकम चुहियो भन्छन्
कुम्लो बनाइ कता लाने बुझ्न सकिएन।।
कत्रो होला धोक्रे भुँडी अगस्तिको तुम्बा
कस्ले पाउँदा कति खाने बुझ्न सकिएन।।
सबै भन्छन् आफूलाई यो घरको मालिक
घर व्यवहार कस्ले धाने बुझ्न सकिएन।।
फटाहा होकि साँचो बोले खुट्याउन गाह्रो
भाषण फुक्दा लरबर याने बुझ्न सकिएन।।
कस्ता आए कस्ता गए लेखा जोखा छैन
आफूलाइ हात्ती किन ठाने बुझ्न सकिएन।।
पहिले पहिले भेडा भन्थे हो होइन कुन्नी
माछा भन्दै भ्यागुतो छाने बुझ्न सकिएन।।
