|
-सम्पा. |
मुकुन्द शर्मा नेपाली साहित्यका सिर्जना र अनुवाद दुवै क्षेत्रमा सुपरिचित प्रतिभा हुन् । उनले संस्कृत साहित्यका महत्त्वपूर्ण सूक्ति र वेद उपनिषद् आदि महत्त्वपूर्ण ग्रन्थहरू नेपालीमा अनुवाद गरेका छन् । साहित्यसागरको प्रस्तुत शृङ्खलामा शर्माको अथर्ववेद पैप्पलाद शाखा ३। २६ । गृहसूक्त ‘गृहनैमि’ लाई ‘घरको महिमा’ शीर्षकमा प्रस्तुत गरिएको छ ।सुखको निवास होस्
पढेर लेखेर फिरेर आउँछु
म पालिएको घर पस्न पाउँछु
यताउता घुम्छु र सुम्सुम्याउँछु
बसेर खाई रसमा रमाउँछु ।
सधैँ भएको धनधान्यको घर
अहो ! मलाई छ असाध्य सुन्दर
महत्त्व जे हो यसको सबै गुनी
रमाइलोमा लहरिन्छ यो जुनी ।
यहाँ रहेका परिवार ढुक्क छन्
मुसुक्क हाँसी रसिला कुरा गरून्
न भीति केही न पियास भोक होस्
रमाउनानिम्ति अनेक थोक होस् ।
बसेर डेराघरमा प्रतिक्षण
म कल्पिइन्थेँ घरमा रमाउन
म आइहालेँ अब बस्न पाइयोस्
दुवार यो स्वागतमा खुलाइयोस् ।
दुधालु गाई पनि गोठमा रहून्
खसी र बाख्रा पनि खर्कमा चरून्
अनाज धेरै छ सुधा बराबर
म धन्य ! आएँ अब फर्किई घर ।
सुखी र दुःखी पनि मित्र आउलान्
रमाउँदै भोजभतेर पाउलान्
विपत्ति पन्छेर सदा निरामय
बनून् निकानन्द जहान निर्भय !
